Davide nakasaway sa Special Weapon and Tactics nga nanion

CEBU, Philippines - Apil nga nakasaway si Gob. Hilario Davide III sa pagpanion og taas nga kalibre sa armas sa usa ka sakop sa Special Weapon and Tactics (SWAT) sa Cebu City Police Office ngadto sa pipila ka opisyal sa lalawigan sa Masbate atol sa Sinulog.

 Gihulagway ni Davide nga “inappropriate” kon dili sakto ang gihimo ni SPO1 Arthur Sabang nga pagpanion ngadto   kang Masbate Gob. Rizalina Lanete ug kaubang mga opisyal niadtong Domingo.

Matud ni Davide nga kinahanglang hatagan og igong courtesy ang mga opisyal ilabi na kay bisita sila sa Sugbo isip mga out-of-town contingent.

Ang Masbate usa sa mga sister provinces sa Sugbo apan giangkon ni Davide nga dili niya personal nga kaila ang gobernador sa probinsiya ug ang uban pa’ng mga opisyal.

Tungod sa maong hitabo, gipaubos na sa camp restriction si Sabang diin dili kini makagawas sa kampo samtang nagpadayun ang administrative investigation kaniya.

Kahinumduman nga nag-public apology ang maong polis apan ipadayun gihapon sa mga biktima ang pagpasaka og kaso batok sa sakop sa SWAT.

Giangkon sa direktor sa Police Regional Office-7, Chief Supt. Prudencio Tom Bañas, nga sayop ang gihimo ni Sabang bisan pa man sa pangangkon nga dili niya tuyo ang pagtion sa armas kay ang pag-iwag lang sa flashlight ang iyang gihimo.  (BANAT NEWS)