Pag-oktaba sa Sangguniang Kabataan elections gipaboran
CEBU, Philippines - Mga opisyal sa gobiyerno uyon sa lakang sa pag-postpone sa eleksiyon sa Sangguniang Kabataan (SK)sa sunod tuig.
Gikatakda nga karong Pebrero 21, 2015 ang pagpahigayon sa eleksiyon sa SK apan matud ni Comelec Provincial Supervisor, Lionel Marco Castillano nga uyon siya nga ma-postpone sa sunod tuig ang eleksiyon sa SK tungod kay dako ang madaginot nga kwarta sa gobiyerno.
Matud niya nga P1.2 bilyones ang budget sa gobiyerno alang sa maong eleksiyon niining tuiga, apan usa ka tuig lang ang termino sa mga molingkod nga opisyal tungod kay sa sunod tuig ipahigayon ang synchronized election sa SK ug barangay.
Subay niini, si Gobernador Hilario Davide III midason sa pamahayag ni Castillano aron makadaginot ang gobiyerno sa gasto. Apan si Castillano miingon nga ma-postpone o dili ang eleksiyon nangandam na silang daan aron di masubli ang hitabo niadtong tuig 2010 nga sibaw kaayo ang balitang ma-postpone kini apan nahinayon diay.
Sa laing bahin, giingong ang Comelec En Banc gikatakdang moisyu og resolusyon kagahapong adlawa sa pagsuspenso sa gun ban ug election period sulod sa 15 ka adlaw.
Si Comelec Chairman Sixto Brillantes nagkanayon nga gipaabot nila nga mopagawas na ang Senado og balaud nga mag-oktaba sa election ug idungan kini sa eleksyon sa Oktubre, 2016. (BANAT NEWS)
- Latest
