P500mil shabu nasakmit
CEBU, Philippines - Lima ka mga tawo ang nasikop sa duha ka managlahing operasyon nga gihimo sa Regional Special Operations Group-7 ug Provincial Intelligence Branch sa Cebu Provincial Police Office kagahapon ug niadtong nakalabay nga adlaw.
Ang mga sakop sa Regional Special Operations Group-7 misikop sa duha ka gihulagway nga idlas nga level 2 drug pusher sa Sitio Seaside, Barangay Pusok dakbayan sa Lapu-Lapu.
Giila ang mga nasikop nga sila si Jason Mingay, 26, nga mao’y target sa mga polis ug batabata niini nga si Poprepol Yunting, 33, pulos nagpuyo sa maong lugar.
Matud pa ni Superintendent Rex Derilo, hepe sa RSOG-7, napalitan nila og P600 nga shabu ang suspek ug dali nilang giposasan. Narekober kanila ang tulo ka dagkong buto ug 255 ka gagmay nga pakete sa gituohang shabu nga mikantidad og kapin P300,000. Giingong gikan sa Muntinlupa ang drugas. Samtang nasikop ‘sab sa Provincial Intelligence Branch ang tulo ka mga lalaki didto sa Barangay Cambiohan dakbayan sa Danao apan nakaikyas ang ilang target nga si Raymund Batulan, 28.
Ang tulo ka mga kauban nga nadakpan mao sila si Geran Sorilla, 29, Roger Lawas Matugas, 24, ug Richard Manco Matugas, 20, nagpuyo sa maong lugar. Nakuha gikan kanila ang upat ka dako nga putos sa gituohang shabu, tulo ka medium packs, duha ka gagmay nga pakete ug napulo ka pakete sa marijuana nga mikantidad tanan og P150,000.
Gawas sa drugas nasakmit ‘sab kanila ang usa ka .45 caliber pistol, usa ka .9mm pistol, usa ka .22 revolver ug mga drug paraphernalia. (BANAT NEWS)
- Latest
