Nisibat sa drug test pasilutan
CEBU, Philippines - Pasilutan gyud sa hepe sa Cebu Provincial Anti-Drug Abuse Commission ang kawani sa Isidro Kintanar Memorial Hospital sa lungsod sa Argao kinsa nisibat atol sa surprise drug test niadtong Martes.
Si Joey Hererra nagkanayun nga unta hatagan og sanction ang maong kawani sa Committee on Discipline and Investigation (CODI).
Ang maong kawani usa ka utility nga nadestino sa tambalanan ug gani wala makuha ang gi-charged niini nga cellphone sa laboratory diin gipahigayun ang drug test.
Ang maong kawani kinsa wala hinganli ni Hererra ang dali’ng nisakay og motorsiklo ug gipaapas kini og polis apan wala masakpi.
Giawhag ni Hererra ang CODI nga paduso-on og suwat sa iyang rason sa pagsibat ang nahisgutang kawani.
Tulo ka kawani sa munisipyo sa Argao ang nagpositibo nga mogamit sa ginadiling drugas.
Ang maong mga kawani dili una i-renew ang ilang mga kontrata samtang nagpaabot pa sa resulta sa confirmatory test.
Sukad niadtong Marso sa milabay’ng tuig nikabat na sa 1,570 ka kawani sa Kapitolyo ug ubang kalungsuran ang napaubos sa drug test diin 68 niini ang nagpositibo.
Matud ni Hererra nga ang mga kawani sa Kapitolyo nga nagpositibo sa drug test gipataktak kini sa gobernador sa ilang trabaho. (BANAT NEWS)
- Latest
