Patay sa Sibonga nailhan na
CEBU, Philippines - Nailhan na sa kapolisan sa lungsod sa Sibonga ang patay nga lawas sa lalaki nga nakit-an nga naglutaw-lutaw sa mga mananagat sa kadagatan sa Simala nga wala na’y sapot ug paingon na sa pagkadugta niadtong nakalabay nga adlaw.
Matud ni PO3 Teofilo Manlanat, desk officer sa Sibonga Police, nga ang patay nga lawas giila nga si Matias Surigao, 38, taga Tangke, dakbayan sa Talisay.
Ang maguwang nga si Rodrigo ang niila sa patay nga lawas human sila napahibawo sa kapolisan.
Sumala pa ni Rodrigo nga tulo na ka adlaw nga nawala ang iyang manghud ug katapusan nila kini nga nakita nga naligo sa dagat sa ilang lugar.
Bugtong ang lastiko nga gibutang sa kamot sa namatay ang nagtudlo sa maguwang nga ilang mailhan ang iyang manghud.
Sigun pa ni Manlanat nga niingon sab ang maguwang sa namatay nga duna’y deperensiya sa panghuna-huna ang iyang igsuon.
“Magbutang butang man daw ni og lastiko sa kamot sir kay medyo duna pud daw ni problema sa huna-huna, kay kung sa nawong ilhon dili na gyud maila kay state of decomposition na gyud siya,” matud ni Manlanat.
Sa inisyal nga imbestgasyon nasayran nga wala’y foul play ang pagkamatay sa maong lalaki ug kini igo lang nalumos ug naanod paingon sa lungsod sa Sibonga. (BANAT NEWS)
- Latest
