RPSB-7 garbo pagbantay sa Santo Papa

CEBU, Philippines – Malipayon nga nahibalik sa Sugbo ang mga sakop sa Regional Public Safety Battalion-7 nga nadestino sa pagbantay sa Santo Papa sa dakbayan sa Tacloban.

Kini ang gitug-an ni Sr. Supt. Clifford Gairanod, battalion commander ug nangulo sa 400 ka polis nga gipadala sa maong lugar sulod sa halos 10 ka adlaw sugod niadtong Enero 10.

Si Gairanod niingon nga daku ang ilang kalipay nga sila ang napili nga mobantay sa Santo Papa kay ila gyud nakita sa personal dihang nilibot sa lugar.

Sumala pa ni Gairanod nga bisan pa man ilang gikasubo nga wala sila nakaapil sa Sinulog sa dakbayan sa Sugbo apan nalipay sila nga ila nakita ang Santo Papa nga talagsaon lang makabisita sa nasud.

Sigun pa sa opisyal nga wala siya nakasabot sa diha’ng iyang nakita ang Santo Papa ug igo lang sila nagpahulagway samtang nagbantay sa mga tawo.

Daghan sa iyang mga sakop ang nangasakit sama sa ubo ug sip-on gumikan sa uwan ug init atol sa ilang pagbarug tibuok adlaw daplin sa dalan sa Tacloban apan wala’y bisan usa nga nireklamo ug ang tanan garbo sa ilang kalampusan.

“Proud mi sa among trabaho sir nga kami ang nagbantay sa Santo Papa,” dugang pa ni Gairanod.

Gumikan sa kalampusan, plano karon sa labing taas nga opisyal sa kapolisan sa nasud nga tagaan og pasidungog ang mga polis nga nibantay sa Santo Papa.

“Bisan og wala na’y pasidungog, okey nami ana, talagsaon ra kaayo to mahitabo,” matud ni Gairanod. – /GMR) (BANAT NEWS)