Polis natagak sa pangpang

CEBU, Philippines – Nakaangkon og grabeng bun-og sa ulo ug nawong ang usa ka polis nga nadestino sa Punta Princesa Police Station human nahagbong  sa pangpang samtang sakay sa iyang bisekleta nga paingon na unta mo-trabaho kagahapon  sa buntag diha sa South Hills, Barangay Tisa ning dakbayan sa Sugbo.

Ang polis giila nga si Senior Police Officer 3 Rene Labiaga kinsa nalandig sa tambalanan human sa aksidente.

Matud pa ni Police Officer 2 Erwin Usares ang desk officer sa Punta Princesa Police Station nga naputol ang brakes sa bisekleta ni Labiaga samtang nagsubay kini sa dulhogong bahin sa dalan kilid sa pangpang nga may gilawumon nga 20 ka metros.

Ang mga nagpuyo sa maong lugar maoy daling mitabang sa maong polis nga gidala kini sa Miller Hospital diin gikatahong kinahanglang abunohan og dugo.

Bag-ohay pa lang ‘sab na-promote si Labiaga niadtong nakalabay nga bulan  nga iyang gihulagway nga usa ka buotan ug tarong nga polis. – /EIM) (BANAT NEWS)