Papal visit malampuson ug mabulokon— Malacañang

CEBU, Philippines - Giisip sa Malacañang nga mabulokon ug malampuson ang Papal Visit nga natapos kagahapon pasado alas-10 sa buntag dihang mibiya na sa nasud ang Santo Papa.

Sa gipagawas nga pamahayag sa Malacañang, ang tigpamaba sa Palasyo nga si Secretary Edwin Lacierda miingon nga ang kalamposan niini angay ipasalamat sa kooperasyong gipakita sa katawhang Filipino.

“Without doubt, on this occasion, the Filipino people once more showed what could be achieved when we work towards a unified endeavor,” matud pa ni Lacierda sa mga tigbalita.

Ang opisyal midugang nga ang tanang nakita sa Santo Papa sa mga Filipino mao ang pagkamahigugmaon, disiplina, pagsalig ug kainit sa pagdawat kaniya. Kini maoy hinungdan nga nahimong mabulokon ang kalamposan sa maong Papal visit.

Gani sa report ni Jessica Soho sa GMA News, kinsa gibagat si Presidente Benigno Aquino III diha sa tarmac sa Villamor Air Base pipila ka minutos gikan milupad ang abyon sa Santo Papa, ang presidente miingon nga gitug-anan kini sa Santo Papa nga nabati niya ang pagmahal kaniya sa mga Filipino.

Gipangutana usab si Aquino kun duna ba kini personal nga hangyo nga gihunghong ngadto sa Santo Papa, apan si Aquino mitubag nga mas giuna niya ang alang sa nasud. Midugang usab si Aquino nga posibleng nahago og maayo ang Santo Papa sa iyang mga lakaw dinhi sa Pilipinas.

Samtang si Manila Archbishop Luis Antonio Cardinal Tagle mihulagway sa kalamposan nga usa ka milagro.

"[It was] an act of communion, an act of solidarity, and it is a miracle in itself. Thanks to God and thanks to everyone, we were able to show to the world that it is possible, [that] communication, cooperation, and collaboration are not just ideas," matud pa niya sa mga tigbalita sa press conference human sa paglupad sa Santo Papa.

Bisan si Archbishop Guiseppe Pinto, ang apostolic nuncio dinhi sa Pilipinas mipaabot sa pasalamat sa Santo Papa sa katawhang Filipino.

Ang pagduaw sa Santo Papa gipanglantawang mibuak sa record sa nangaging mga Papal Visits sa bisan asang nasud sa kalibotan kun padaghanay sa mga nanambong maoy hisgutan.

Sumala pa nga 6 milyones ngadto sa 7 milyones ka tawo ang mitambong sa Santos nga Misa nga gihimo diha sa Quirino Grandstand sa Luneta Park.

Unang higayon usab nga nagsuot og kapote ang usa ka Santo Papa samtang nagmisa ug nasaksihan sa katawhan ang pagka-simple niini nga tawo bisan pa man sa iyang posisyon sa kalibotan. (BANAT NEWS)