P500T nga drugas nasakmit sa Badian

CEBU, Philippines - Kapin sa tunga sa milyon ka pesos nga drugas ang nasakmit sa Regional Special Operations Group-7 gikan sa duha ka tawo kinsa usa kanila giila nga level 2 drug pusher sa managlahi’ng buy-bust operation sa lungsod sa Badian niadtong nakalabay nga kadlawon.

Ang mga nasikop mao sila si Marcelino Jabido, taga barangay Dagatan ug Jerome Habil, taga barangay Poblacion sa maong lungsod.

Matud ni Supt. Rex Derilo, hepe sa RSOG-7, nga halos duha ka semana nga ilang gipaubos sa pag-monitor si Jabido nga gihulagway nga level 2 drug pusher. Sa pagsikop sa kapolisan, ilang narekober ang lain pa’ng mga drugas nga naglakip sa usa ka daku nga putos, usa ka medium size ug 64 ka gagmay nga putos sa gituohang drugas.

Apil sa nakuha sa kapolisan ang mga armas nga naglakip sa usa ka improvised shotgun, duha ka bala sa shotgun, usa ka .22 revolver, lima ka bala sa .22 revolver, usa ka .45 caliber pistol, upat ka bala sa .45 pistol ug usa ka magazine sa maong armas.

Human sa operasyon, pasado alas 6 sa buntag nilahos ang mga sakop sa RSOG-7 sa barangay Poblacion diin gihimo ang buy-bust operation batok ni Habil nga gitudlo’ng sakop ni Jabido nga nagbantay sa usa ka drug den. Nakuha sa kapolisan gikan sa posesyon ni Habil ang duha ka dagku nga putos, usa ka medium size ug lima ka gagmay nga pakete sa gituohang drugas. Gitug-an sa taga RSOG-7 nga nasikop na kaniadto’ng nakalabay nga tuig sa RSOG-7 ug Regional Intelligence Division-7 si Jabido apan nakagawas human nakapiyansa. Gitumbok sa kapolisan nga usa ka big time drug pusher si Jabido nga sakop sa usa ka notadong druglord. Gitanggong na sa karsel sa RSOG-7 ang duha ka mga dinakpan nga mag-atubang og tukmang kaso. (BANAT NEWS)