Babaye hubog, nanunggab sa kapuyo
CEBU, Philippines - Gidunggab sa 37-anyos nga babaye ang iyang kapuyo nga gikalalis niadtong Domingo, alas 2:15 sa hapon, sa ilang balay sa Purok Butterfly, Babag, dakbayan sa Lapu-Lapu.
Matud ni PO1 Jade Querubin sa Lapu-Lapu City Police Office, ang biktima mao si Vergilio Senerpida, taga barangay Gun-ob samtang ang suspek mao si Cecilda Taneo, nagpuyo sa gihisgutang dapit.
Sa inisyal nga pakisusi, si Taneo nakig-inom sa iyang mga higala sa usa ka tindahan sa maong barangay.
Nakit-an ni Senerpida ug giduol ang iyang kapuyo kinsa gituohan nga hubog na ug nasuko.
Pag-uli sa ilang balay, niulbo og samot ang kasuko sa suspek ug nisangko sa grabeng panaglalis.
Tunga-tunga sa panagbangi sa duha, kalit nikuha og hait nga hinagiban si Taneo ug gidunggab ang biktima sa tuong bahin sa iyang abaga.
Dali’ng gidala sa Lapu-Lapu City District Hospital si Senerpida ug gibalhin sa Vicente Sotto Memorial Medical Center.
Si Querubin midugang nga ang suspek dali’ng gidakop sa mga miresponde’ng polis sa Gun-ob Police Station 3 dayun gibalhug sa LLCPO detention cell ug pasakaan og kasong attempted homicide. (BANAT NEWS)
- Latest
