Mamistahay natikyaob
CEBU, Philippines – Naluwas sa tourist motor banca ang 16 ka pasahero sa natikyaob nga motor banca dihang nasugatan ang dagku’ng bawod sa kadagatan sa lungsod sa Cordova alas 12 pasado sa udto niadtong Biyernes.
Si SPO1 Laurencio Wagwag sa Cordova Police Station miingon nga ang 16 ka pasahero nga gilangkuban sa mga hingkod na ug mga bata gikan sa isla sa Hilutungan.
Gimaneho sa tag-iya nga si Nicomedes Tamonda, 57-anyos, ang motor banca padulong maghatud sa iyang mga pasahero sa Pasil, dakbayan sa Sugbo alang sa pagpamista.
Ang tourist motor banca nga giluwanan sa mga Koreans nga nahiagi sa dapit ang nakabangal sa mga pasahero nga naglangoylangoy na sa kadagatan nga naglakip sa 4-anyos nga bata.
Ang pipila ka mananagat sa maong dapit nga nakasigpat sa maong hitabo nagdali sab sa pagpaduol ug nitabang sa pagluwas sa mga biktima ug ilang gidala daplin sa baybayon sa nahisgutang dapit. – /GMR) (BANAT NEWS)
- Latest
