Naghikog sa lodge nailhan na
CEBU, Philippines - Nailhan na sa kapolisan ang patay’ng lawas nga gikataho nga naghikog sulod sa kuwarto sa Hidden Lodge sa barangay Guizo, dakbayan sa Mandaue. Si Police Officer 2 Jesson Flores miila sa patay’ng lawas nga si Welbert Taglip Jr., 23-anyos, taga sitio Santa Maria, Pusok, dakbayan sa Lapu-Lapu ug graduating sa kurso’ng Bachelor of Science in Marine Transportation (BSMT) sa University of Cebu Lapu-Lapu and Mandaue (UCLM).
Matud ni Flores nga ang amahan nga si Welbert Sr. ang miila sa patay’ng lawas sa iyang anak kinsa miingon nga niadto pa’ng Enero 14 nga nilakaw sa ilang panimalay paingon sa iyang tunghaan sa UCLM sa barangay Looc, dakbayan sa Mandaue.
Dugang ni Flores nga nagbaton og katahap ang amahan nga adunay foul play ang kamatayun sa iyang anak hinungdan nga gipaubos sa autopsy ang patay’ng lawas niini.
Si Flores miingon nga ilang gibase ang ilang taho sa migawas nga resulta sa autopsy nga ang paghikog pinaagi sa paghigot og bed sheet maoy hinungdan sa kamatayun niini. (Romeo T. Limpangog/GMR)(BANAT NEWS)
- Latest
