Mga marijuana sa Pung-ol natultolan

CEBU, Philippines - Mukabat sa 60 ka dagku’ng punoan sa marijuana ang gipangibot sa mga sakop sa Regional Public Safety Battalion-7 sa bukirang bahin sa barangay Pung-ol, dakbayan sa Sugbo niadtong nakalabay nga kadlawon.

Dugang niini ang 40 pa ka gagmay nga bag-ong tanum nga marijuana.

Matud ni Supt. Melbert Esguerra nga ilang nadumduman ang mga gipangtanum nga marijuana human nitug-an kanila ang mga opisyal sa barangay.

Apan atol sa operasyon, wala’y nasikop nga tigtanum sa mga marijuana ang kapolisan.

Gipasabot ni Esguerra nga sudlonon ug lisud kaayo dumdumon ang maong lugar sanglit nahimutang sa hilit nga lugar.

Sumala pa ni Esguerra nga usa ka “timberland” ang maong lugar ug lagyo sab sa mga nagpuyo nga mga residente.

Gitug-an ni Esguerra nga gawas sa barangay Pung-ol, duna pa sila’y gi-monitor karon nga laing dapit sa bukirang bahin sa Sugbo nga posible’ng duna’y gipangtanum nga marijuana.

Hinuon masaligon ang opisyal nga ila ra madumduman ang maong mga dapit ug makuha ang mga illegal nga tanum uban sa tabang sa mga opisyal sa barangay. (Jojo C. Ugdol/GMR)(BANAT NEWS)