Seguridad andam na

CEBU, Philippines - Gitapok kagahapon sa buntag sa hawanan sa Camp Sotero Cahabug sa Cebu City Police Office headquarters ang 800 ka mga polis gikan sa nagkadaiyang bahin sa Rehiyon 7 nga maoy idugang sa mga sakop sa CCPO alang sa seguridad sa mga kalihokan karong adlawa ug ugma.

Gibahin na silang daan kung asa sila nga buhatan madestino ug asa nga bahin sila sa Sugbo mobantay.

Ang Officer In-Charge Chief sa Cebu City Police Office, Senior Superintendent Conrad Capa mipasabot ngadto sa mga polis gikan sa laing lugar nga ang ilang sakripisyo tipik ug kabahin sa mandato sa kapulisan nga sigurohon ang seguridad lukop siyudad alang sa dakong selebrasyon.

Sigun pa ni Capa nga siya mismo ang mangunay pagbantay sa mga polis sa kadalanan kun magmika sila sa ilang tahas ug andam ‘sab  siya nga magutman kauban sa iyang mga sakop basta lang ilang matuman ang ilang tahas.

Samtang agi og pakigduyog sa dakbayan sa Sugbo, gibutang usab sa full alert status  ang kapolisan sa probinsya pinangulohan ni Sr. Supt. Noel Gillamac ,aron pagsala sa mga tawong mosulod gikan sa mga kalungsoran.

Samtang ang hepe sa Provincial Disaster Risk Reduction Management Office (PDRRMO), Baltazar Tribunalo miingon nga nagbutang sila og 15 ka mga emergency stations sa kadalanan, usa niini ang anaa duol sa Cebu City Sports Center.

Awhag ni Tribunalo sa tanan nga bisan pa man sa mga kalingawan nga giandam sa Sugbo, kinahanglan nga magmabinantayon gayud. (Jojo Ugdol ug Rosamin D. Lincaro, USJ-R Intern/EIM)(BANAT NEWS)