CSBT ibalhin una sa SRP

CEBU, Philippines - Ang Cebu South Bus Terminal temporaryong sirad-an karong Domingo tungod usa kini sa maapektohan sa road closure alang sa Sinulog Grand Parade.

Ang maong terminal temporaryong ibalhin sa South Road Properties aron dili mahunong ang operasyon sa maong pasilidad ug aron maibanan ang katawhan nga modasok sa N. Bacalso Avenue diin manukad ang grand parade. Usa ka meeting ang gihimo sa mga bus operators, Cebu City Traffic Operations Management (CITOM), Land Transportation Franchising & Regulatory Board (LTFRB)-7, ug ubang ahensiya niadtong Miyerkules sa gabii.

Gibutyag ni CITOM operations head Jonathan Tumulak nga magsugod ang pagsirado sa South Bus Terminal sa alas-10 sa gabii sa Sabado ug ablihan kini’g balik inig alas-11 sa gabii.

Ang rota sa bus gikan sa South moagi sa N. Bacalso Ave. mosulod ilawom sa flyover sa Mambaling ug diretso na sa temporary terminal sa SRP. Ang mga sakyanan nga naggikan sa temporary terminal sa SRP, mogawas  lahos sa Talisay City.  Gibana-bana nga mokabat sa 100,000 ka mga tawo ang modagsa sa siyudad sa Sugbo nga maggikan sa South.

Ang LTFRB-7 mipagawas og special permit sa gatosan ka mga public utility vehicles ubos sa Cebu Integrated Transport Service Cooperative (Citrasco) ug adunay pletihan nga P7.00.

 Ang maong mga pasaheroan mo-pickup og pasahero gikan sa temporary terminal sa SRP hangtod sa Campaña Maritima ug vice versa. (BANAT NEWS)