Bantay sa kiriwan atol sa Sinulog
CEBU, Philippines - Gipahimangnoan sa Cebu City Police Office ang mga motan-aw sa Sinulog sa pagbantay sa mga kiriwan.
Hinuon matud sa direktor sa CCPO, Police Senior Supt. Conrad Capa, nga wala siya’y nadawat nga impormasyon nga dunay mga grupo sa mga kriminal ang midagsa sa Sugbo.
Apan ilang gilauman nga mogara gyud kini panahon sa Sinulog tungod sa kadaghan sa mga tawo ug mosiaw ang mga badlungon sa katilingban sama sa mga mangunguot ug tulisan.
Tungod niini, dunay mga polis nga ipakatap apan dili mag uniporme aron maoy mosubay sa kadalanan ug magbantay sa mga dautang elemento.
Karong adlawa moabot ang mga polis nga gikan sa laing yunit aron i-augment sa Sinulog nga maoy mopatuman sa kahapsay ug kalinaw.
Si Capa miingon nga andam na ang tanan human sa ilang gihimong preparasyon ug lauman nga ma-enjoy sa publiko ang Sinulog karong tuiga.
Dugang ni Capa nga nakadayeg siya sa gipakita’ng suporta sa nagkalainlaing grupo nga nagtinabangay aron mapatuman ang kahapsay ug kalinaw alang sa selebrasyon. (BANAT NEWS)
- Latest
