Balay naugdaw

CEBU, Philippines - Usa ka balay ang naugdaw sa sunog nga miigo sa Ariola Compound, Barangay Busay ning dakbayan sa Sugbo, kagahapon sa buntag.

Matud pa ni Fire Officer 3 Ferlando Iban ang imbestigador sa Bureau of Fire nga alas 11:38 nila nadawat ang alarma sa maong sunog ug  nakontrolar kini human sa 15 minutos.

Ang nasunog nga balay gipanag-iya ni Erlinda Mangubat, apan gipuy-an sa iya nga pag-umangkon nga si Donlad Pologrates nga wala sa balay atol sa hitabo.

Sumala pa ni Iban nga posibleng electrical misuse ang hinugdan sa sunog nga nagsugod sa kisame.

Wala na nakakatap ang kalayo sa tapad nga mga balay  bisan sa kahuot sa dapit tungod kay napasiritan kini dayon og tubig sa mga bombero. Gibana-bana nga kapin sa P100,000 ang danyos sa maong sunog. (BANAT NEWS)