Karo sa Sto. Niño higpit bantayan

CEBU, Philippines - Higpit nga bantayan sa kapolisan ang karo sa imahen sa Senior Sto. Niño sa paghidangat sa dakbayan sa Mandaue atol sa Traslacion ug foot procession.

Usa sa hinungdan nga higpitan ang pagbantay sa karo sa imahen mao ang paglikay sa kasamok ug ang pagkawagtang sa mga buwak nga gidayandayan.

Matud ni Senior Insp. Allan Cuizon, deputy chief for operation ug public information officer (PIO) sa Mandaue City Police Office (MCPO), nga mawagtang na hinuon ang kabalaanon sa kalihukan kay mag-ilogay na man sa pagkuha sa buwak sa karo ug moresulta sa kagubot sa kadalanan kay mahitabo na man ang pagtinukmuray.

Matud ni Cuizon nga ang 100 nga Reserve Officer Training Corps (ROTC) sa University of Lapu-Lapu and Mandaue ang mobantay sa karo nga maggunit sa pisi nga magsilbing ali sa palibot.

Moabag sa pagbantay ang mga sakop sa Barangay Public Safety Officer (BPSO) o mga barangay tanod ug abagan sa mga volunteer groups. Aron paglikay sa mga mangunguot ug manglabnihay, giawhag ni Cuizon ang mga deboto nga likayan ang pagsul-ob sa mahalon nga mga alahas. (BANAT NEWS)