Pasyente sa VSMMC nag-wild, guwardiya gidunggab

CEBU, Philippines – Anaa sa delikadong kahimtang ang usa ka guwardiya sa Vicente Sotto Memorial Medical Center (VSMMC) human gidunggab sa usa ka lalaki nga nag-wild sulod sa maong tambalanan niadtong nakalabay nga hapon.

Ang biktima naila nga si Jonathan Flordelez, 47, taga barangay Cogon Pardo, dakbayan sa Sugbo nga nadestino sa Center for Behavioral Sciences  sa VSMMC.

Samtang ang suspek naila nga usa ka 28-anyos nga traysikad drayber ug temporaryo nga nagpuyo sa Mantuyong, dakbayan sa Mandaue.

Matud ni Dr. Rene Obra, hepe sa Center for Behavioral Sciences, nga Lunes sa kadlawon naabot sa tambalanan ang suspek kuyog ang iyang live-in nga paingon manganak.

Apan matud ni Obra nga namatay ang anak sa suspek human nga nagkakomplekado ang pagpanganak sa iyang live-in ug pasado alas 4 sa kadlawon nagsugod na nga nausab ang batasan sa suspek ug nag-wild sulod sa tambalanan.

Sumala pa ni Obra nga posibleng usa sa nagtukmod og nakapasamot sa gibati sa maong lalaki kay gibiyaan kini sa iyang live-in partner sa tambalanan.

Ang maong lalaki matud pa nibahad pa nga gusto na sab niini nga mamatay kay namatay man ang iyang anak.

Human sa hitabo nakahukom ang tagdumala sa VSMMC nga dalhon na lang sa Center for Behavioral Sciences ang maong lalaki aron maobserbaran.

Si Obra mipasabot nga ang maong lalaki duha ka tuig na sab diay nga tiggamitan og drugas.

Apan sa pagkahapon kalit lang midagan ang lalaki paingon sa gawas ug sa dihang natagboan niini ang guwardiya kalit lang niya gidunggab igo sa likod nga bahin.

Matud pa ni Obra nga usa sa iyang gusto mahibaw-an kung diin gikan ang kutsilyo nga gigamit.

Human sa hitabo dali nga gihatud sa taga VSMMC ang maong lalaki sa Fuente Police Station diin kini kasamtangan nga gitanggong.

“Matawag gyud siya nga pasyente diri, pero didto lang siya karon sa Fuente Police,” matud ni Obra.

Atol sa maong hitabo, ang homicide section sa Cebu City Police Office ang wala nakadawat sa maong alarma.

Nagtuo ang usa ka sakop sa homicide section nga posibleng naulaw lang ang taga VSMMC nga motawag kanila sanglit una na nila’ng gireklamo ang ka istrikto sa tambalanan nga dili magpasulod og polis.

Ang hepe sa Fuente Police nga si Chief Insp. Wildemar Tiu miingon nga ila ibalik sa VSMMC ang maong lalaki kay matud pa may inisyal na nga pagsubay ang mga doktor ug kini sab usa man ka pasyente sa maong tambalanan.

Si Tiu nahadlok nga basin maghikog ang maong lalaki sulod sa ilang bilanggoan. – /GMR) (BANAT NEWS)