Paspasi ang kampanya batok shabu–Gillamac

CEBU, Philippines – Ang kapolisan sa kalungsoran sa Sugbo gimandoan nga mohingusog g’yud sa paghimo’g kampanya batok sa mga tigpayuhot og gidili nga mata’ng sa drugas sa tagsa-tagsa nila ka dapit.

Matud ni Cebu Provincial Police director Noel Gillamac nga dili siya makabasol nga ang katawhan magduda nga giprotehean sa kapolisan ang mga tigpayuhot og drugas kun wala sila’y aksyon kabahin niini. Si Gillamac miingon nga ang katawhan nasayod kun kinsa ang mga nalambigit sa pagpayuhot og gidili nga matang sa drugas mao nga imposible nga ang kapolisan wala mahibalo.

Nasuta ni Gillamac nga daghang mga lungsod nga ang ilang kapolisan walay maayo’ng agi sa kampanya batok sa gidili nga drugas apan usahay mahimoan na lang og pagpangronda sa ubang police units ang mao nga dapit.

Matud ni Gillamac nga sa usa ka lugar halos tanang tawo nakaila kun kinsa ang mga drug pushers apan ang mga polis wala’y gihimo aron pagdakop sa mga nakahimo og salaod.

Daghan na og kalampusan ang mga sakop sa CPPO sa kampanya batok sa gidili’ng drugas apan wala pa makontento si Gillamac mao nga mopahigayon siya og conference sa iyang mga hepe sa kapolisan. Wala motug-an si Gillamac kun mituo ba siya nga adunay mga hepe sa kapolisan nga nagproteher og mga drug lords sa tagsa-tagsa nila ka dapit. Ang mga sakop sa CCPO intelligence branch maoy sagad mohimo og pagpangronda sa mga tigpayuhot og drugas sa kalungsuran nga wala mahimoi og aksyon sa mga polis sa mao nga lungsod.

Apil niini mao ang pagkasikop sa ilado’ng pusher sa Barangay Valladolid, Carcar sa miagi’ng Sabado diin P700 mil nga kantidad sa shabu ang nasakmit. – /RUB) (BANAT NEWS)