Low pressure mosulod sa di pa ang Sinulog

CEBU, Philippines – Gipaabot nga may ginagmay nga pag-uwan ug kusog-kusog nga hangin atol sa adlaw sa Sinulog sa dakbayan sa Sugbo karong Domingo.

Kini human gipahibawo sa PAGASA-Visayas nga ang low pressure area (LPA) nga ilang nasigpatan gilauman nga mahimong tropical cyclone karong Huwebes. Matud ni PAGASA-Visayas director, Engr. Oscar Tabada, nga ang LPA nahimutang atbang sa Northern Northeastern Mindanao.

Gumikan niini, masinati ang mga pag-uwan ug kusog-kusog nga hangin karong adlawa ingon man ugma. Hinuon sa Miyerkules, ang PAGASA miingon nga maayo ang panahon apan may paghuros gihapon sa hangin.

Sa adlaw'ng Biyernes hangtud na sa Sabado, duna’y kusog-kusog nga pag-uwan ug hangin.

Sa Domingo, masinati ang hinay nga pag-uwan ug pagtutaligsik.

Awhag sa ahensiya sa katawhan nga dili kalimtan nga magdala og panagang sa init ug uwan aron malikayan nga matakbuyan og sakit.

Samtang gilusad kagahapong adlawa sa PAGASA Mactan ang infoboard nga gihatag kanila sa usa ka telecommunications company.

Gihulagway ni Engr. Al Quiblat, pangulo sa PAGASA Mactan nga mahinungdanon ang infoboard aron mapadangat ang mga impormasyon gikan sa PAGASA nga nagkinahanglan og maayong communication system.

Ang PAGASA dunay programa nga gitawag og “way to go to 2016” nga  gitawag nga robust type of communication system.

Pasabot sa robust, magkinahanglan ang ahensiya og paspas ug kasaligan nga communication system aron dili mapakyas ang kinatibuk-ang sistema kun dunay usa nga mokagar.

Ang infoboard usa ka application nga libre ug maka-send og impormasyon gikan sa PAGASA ngadto na sa daghang recipients sa usa lang ka pagpadala sa mensahe. – /GMR) (BANAT NEWS)