Driver sa traysikol natagak patay
CEBU, Philippines – Nanglayat ang mga pasahero dihang ilang namatikdan nga ang traysikol nga ilang giluwanan nagdagan nga wala na’y drayber human natagak ug namatay alas 9 pasado kagahapon sa buntag sa dalan M.L, Quezon, Cabancalan, dakbayan sa Mandaue.
Si PO3 Ruben Serdeña, imbestigador sa traffic division sa Mandaue City Police Office (MCPO), miila sa namatay nga si Henry Endab Mabago, 56, taga barangay Guizo sa maong dakbayan.
Matud ni Serdeña nga wala hinuon makasinati og kadaut ang traysikol nga nihunong lang dihang napawong ang makina apan nakapangambak na ang mga pasahero tungod sa hilabihan nga kakuyaw.
Dali nga gihatud sa Mandaue City Hospital ang drayber apan gideklarar nga patay na.
Wala’y naangol sa mga pasahero nga nangambak sanglit hinay man ang dagan niini ug naatol sab nga wala’y gikasugat nga laing sakyanan. – /GMR) (BANAT NEWS)
- Latest
