Balay gisunog sa anak sa tag-iya

CEBU, Philippines – Naugdaw ang usa ka panimalay nga ginama sa light materials sa Upper Suran, Kinasang-an, Pardo, siyudad sa Sugbo human gisunog sa anak sa tag-iya sa maong panimalay kagahapon sa buntag.

Gisikop sa kapolisan sa Pardo ang suspek nga si Jerome Nazareno, 25-anyos, ulitawo ug molupyo sa maong dapit kinsa gikatahong maoy responsable sa sunog.

Sigun ni Senior Fire Officer 1 Ramon Molina sa Cebu City Fire Department nga nakadawat sila sa alarma alas 10 sa buntag ug giisa kini sa first alarm.

Nakontrolar ang sunog sulod sa 10 minutos ug gideklarar nga fire out alas 10:35 sa buntag.

Swerteng wala’y naangol o nakalas nga kinabuhi atol sa maong panghitabo.

Nagsugod ang sunog sa ikaduhang andana sa panimalay nga gipanag-iya sa magtiayun nga sila si Romeo ug Jean Nazareno kinsa mao’y mga ginikanan sa suspek ug gibana-bana nga mokabat sa P40 mil ang danyos sa maong sunog.

Giingong nag-inusara ang suspek sa panimalay ug nibahad nga sunugon ang balay kung biyaan siya nga mag-inusara.

“Nanaad man gud na siya nga kung siya ra gani mahabilin sa balay iya gyud ning sunugon,” sigun ni Molina.

Nibutyag ang mga silingan nga nakit-an nila ang suspek nga nagdali-dali og gawas gikan sa balay atol sa pagsilaob niini.

Si SPO3 Rene Barral sa Pardo Police Station nagkanayon nga posibleng tiggamitan og ilegal nga drugas ang suspek.

Wala pa masuta kung unsa’y hinungdan ngano’ng gisunog sa suspek ang ilang balay apan ang inahan sa suspek miingon nga ila kining ipa-rehab.

Kasamtangang gibalhug ang suspek sa selda sa kapolisan apan ang mga ginikanan niini wala’y plano nga mopasaka og kaso batok kaniya.

Sa laing bahin, nasunog ang Don Carlos A. Gothong Port Centre Building sa Pier 4, siyudad sa Sugbo Domingo sa gabii.

Nadawat sa kabomberohan ang alarma alas 7:40 sa gabii ug nakontrolar kini alas 8:27 sa gabii.

Sa pasiunang imbestigasyon sa Bureau of Fire Protection, nagsugod ang sunog sa ikatulong andana sa edipisyo.

Padayun pa’ng giimbestigar ang hinungdan sa sunog ug kung pila ang danyos niini. – /GMR) (BANAT NEWS)