Armas sa gobiyerno ang gigamit?

CEBU, Philippines – Ang kapulisan sa Cebu Provincial Police Office misubay karon sa posibilidad nga ang high powered nga armas nga gigamit sa pagpusil patay ni Cambang—og barangay kapitan Timoteo Largo niadtong nakalabay nga Martes, gipanag-iya sa sakop sa kapulisan o sa kasundalohan.

Usa ka M16 Assault Rifle ang gigamit sa gunman nga si Dionesio Juarez sa pagpusil patay sa biktima nga giingong usa ka police informer.

Ang hepe sa Cebu Provincial Police Office nga si Senior Superintendent Noel Gillamac mimando nga subayon kung asa gikan ang maong armas.

“Walay confirmation but makaingon man gud ‘ta nga high-powered man gud na posible gikan na sa mga sources nga nag-deal og armas. But still ato nang i-check asa na gikan nga armasa nga supposed to be ang magkupot ana AFP personnel or PNP personnel man,” matud pa ni Gillamac.

Lakip sa gisusi kung gikan sa usa ka pribadong indibidwal o ba kaha kun mao kini ang nawala nga armas sa opisyal sa polis sa lungsod sa Alcantara.

“Isusi nato asa gikan ang armas. Nawad-an man ‘tag armas sa Alcantara, so there’s a possibility nga mao na’y gigamit nga armas sa suspek,” sumala pa ni Gillamac.

Nag-atubang na og kasong grave misconduct ang maong polis nga nawad-an sa iyang armas human kini mitambong og fiesta mga duha ka bulan na ang nakalabay.

Hinuon giklaro ni Gillamac nga wala’y koneksiyon ang kaso ni Juarez ug sa police official nga nawad-an sa iyang armas.

Samtang giklaro ni Gillamac nga si Juarez dili sakop sa “police tracker” apan kini kanhi sakop sa Civil Security Unit sa dakbayan sa Toledo.

“He will be considered just like an ordinary criminal,” sigun pa ni Gillamac.

Hangtod karon nagpadayon pa ang pagpangita sa mga sakop sa Toledo Police ug Provincial Intelligence Branch (PIB) kang Juarez nga dali ‘sab nga nakasibat human sa krimen.

Anggulo sa illegal nga drugas ug illegal quarrying ang gisubay nga motibo sa maong pagpatay sa kapitan. – /EIM) (BANAT NEWS)