Tireman gipatay sa silingan

CEBU, Philippines - Patay ang usa ka tireman kinsa gipusil sa iyang silingan pasado alas 11:00 sa miaging gabii sa sitio Rail Site, Sto. Niño, barangay Hipodromo, dakbayan sa Sugbo.

Ang biktima naila nga si Manuel Cabilete, 32, molupyo sa nahisgutang lugar samtang ang suspek naila nga si Ruben Villamor, 22, nga iya ra pud silingan. Base sa imbestigasyon nga gihimo ni SPO4 Rey Cuyos sa Homicide Section sa Cebu City Police Office nga nagkalalis pa ang duha sa wala pa mahitabo ang pagpamusil.

Nadunggan sa mga saksi nga gibaharan sa suspek ang biktima nga miingon, “bantay ka ha, saka nya ngari” samtang ang suspek nilakaw padulong sa iyang balay.

Pipila ka gutlo ang nilabay ang biktima nilakaw aron magpalit og pagkaon duol sa balay sa suspek apan pag-abot na niya gipaulanan siya og bala sa suspek hinungdan sa iyang pagkahagba.

Tungod sa daghang samad pinusilan sa biktima nakabsan sa iyang kinabuhi pipila ka gutlo human siya gipusil ug dali nga nisibat ang suspek. (Bryner L. Diaz ug USJ-R Masscom Intern Lorelyn D. Dechos/GMR) (BANAT NEWS)