Nagpabakuna og Anti-Rabies nidaghan
CEBU, Philippines - Nagkadaghan ang ihap sa mga nagpabakuna sa anti-rabies sa dakbayan sa Toledo sa nakalabay’ng mga adlaw.
Matud ni Dr. Esperanza Canumay, ang labaw sa City Health Toledo nga nidoble ang ihap sa mga pasyente nga naglinya sa ilang buhatan sa pagpabakuna batok sa kagaw gikan sa sakit nga rabies human sila mapaaki og iro o iring. Ang siyudad nakatala og kapin sa 40 ka mga pasyente ang nagdasok sa ilang buhatan sukwahi sa naandan nga anaa lamang kini sa 20 ka mga pasyente. Gihimug-atan sa opisyal nga tungod kini sa taas nga bakasyon hinungdan nga naghuot ang mga pasyente nga magpabakuna.
Nasayran nga sa matag adlaw nga Lunes ug Huwebes ang pagpahigayon sa pagbakuna sa anti-rabies.
Samtang wala hinuoy nibisita sa city health nga magpabakuna alang sa anti-tetanus kalabot sa posibleng biktima sa pabuto sa nakalabay’ng Pasko ug Bag-ong Tuig. Gisiguro hinuon ni Canumay nga aduna sila’y igo nga pundo sa mga bakuna alang sa anti-rabies ug anti-tetanus. (BANAT NEWS)
- Latest
