9 balay naugdaw

CEBU, Philippines - Siyam ka mga balay ang naugdaw sa nahitabong sunog sa Sitio Cana-as, Barangay Guadalupe ning dakbayan sa Sugbo kagahapon sa hapon.

Sumala pa ni Senior Fire Officer 1 Emeliano Daño, arson investigator sa Cebu City Bureau of Fire Protection nga nahinabi sa Banat News alas 2:21 nila nadawat ang alarma ug sulod sa 20 minutos nila kini nakontrolar.

Subayon pa ni Daño ang report nga sa gipaabangang bahin sa balay sa usa ka Laxly Lopez nagsugod ang sunog. Subayon pa nila ang duha ka report nga nag-ingong mi-overheat nga electric fan ug cellphone charger  ang sinugdanan niini.

Ang silingan ug tapad sa balay ni Lopez nga si Romeo Tañeca nga nahinabi sa Banat News mitug-an nga nakadungog na lang siyang may misinggit nga sunog, wala hinuon maapil iyang balay nga unta usa lang ka metros ang distansya niini sa balay nga unang nasunog.

Si City Fire Marshal Reogelio Bongabong miingon nga naproblema sila sa kagamay sa dalan kay di kasulod ang firetrucks maong gisumpay-sumpay nila ang mga firehoses.

 “Maayo na lang kay buntag ug gabie pa, samot kalisod kay gama’y kaayo ang dalan”, matud pa ni Bongabong. Miabot og 2nd alarm ang ma’ng sunog ug nagbilin kini og P150 mil nga danyos. (BANAT NEWS)