Dakpon g’yud ang mipatay sa kapitan— Gillamac

CEBU, Philippines – Ang mga sakop sa intelligence branch sa Cebu Provincial Police Office (CPPO) gimandoan nga moabag aron madakpan ang nagpatay sa kapitan sa Barangay Cambang-og, dakbayan sa Toledo kaniadto’ng Martes.

Hangtud karon gipangita pa si Dionesio Juarez, ang kumpare ni Kapitan Timoteo Largo nga gipatay human babagi ang iyang sakyanan sa mingaw nga dapit didto sa Barangay Ilihan. Si Cebu provincial police director Noel Gillamac nagkanayon nga gitug-anan siya ni Toledo City police chief Ricky Delilis sa posible’ng dapit nga gitagoan karon ni Juarez. Matud ni Cebu Provincial Board Member Grecilda Sanchez nga daku ang iyang pagtuo nga gipatay ang barangay kapitan tungod sa pagkampanya niya sa ilegal nga drugas ug ilegal nga pagpanguha’g bas ug graba sa iyang dapit.

Ang opisyal sa probinsya miingon nga pipila ka buwan ang nakalabay personal g’yud nga miduol kaniya si Kapitan Largo ug mitug-an sa mga ilegal nga kalihukan sa iyang barangay.

Kini maoy gituohan ni Sanchez nga si Kapitan Largo gipatay sa iyang kumpare nga gituohang nalambigit sa ilegal nga kalihukan sa Barangay Cambang-og. Gimandoan ni Gillamac ang hepe sa Toledo City Police nga dalion ang pagkuha og pamahayag gikan sa mga testigos sa pagpatay ni Largo aron magamit kini sa pagpasaka og kaso.

Si Gillamac miingon nga ang gihimo nila karon mao ang pagpahigayon og hot pursuit operations ingon man ang pagkuha og mga affidavit gikan sa mga witnesses.

Dunay usa ka babaye nga nahinabi sa television reporter nga iya pa gani’ng giingnan ang tawo nga nagpusil sa kapitan kun ngano nga gihimo niya ang krimen. Ang 65-anyos nga kapitan maghatud unta sa iyang anak sa usa ka tunghaan sa dakbayan sa Toledo apan gibabagan ang iyang agianan sa sakyanan sa suspetsado.

Diha’ng nanaug ang suspetsado, gikalitan siya’g pusil. – /RUB) (BANAT NEWS)