Budget sa Talisay

CEBU, Philippines – Ang Annual Budget 2015 sa dakbayan sa Talisay gituohan nga aprobahan na sa konseho sa siyudad apan laslasan nila ang P713 milyones nga gipangayo ni Mayor Johnny V. Delos Reyes. Ang kadaghanan sa mga konsehal sa Talisay mga sakop sa Alayon Party nga dili kaalyado sa mayor.

Kini naglakip nila ni Konsehal Choy Aznar ug Soc Fernandez. Matud ni Vice Mayor Romeo Villarante nga dili mahitabo ang reenacted budget kay aprobahan g’yud nila sa konseho ang gahin para karong tuiga apan ibanan lang ang kantidad.

Si Mayor Delos Reyes miingon nga gamay na lang kaayo ang budget nga ilang magamit alang sa mga proyekto sama sa pagpaaspalto sa mga gagmay’ng karsada sa lainlaing barangay. Ang bise mayor nga maoy pangulo sa konseho miingon nga karong tuiga posible’ng susama o kaha mas gamay pa sa P600 milyones nga annual budget sa miagi’ng tuig ang ilang aprobahan.

Apil sa ibanan sa konseho mao ang intelligence fund sa mayor nga gihulagway sa mga sakop sa mayoriya nga wala magamit sa iyang katuyoan.

Daan na nga gipahibawo ni Mayor Delos Reyes nga dili niya pirmahan ang budget nga aprobahan sa konseho kun laslasan pag-ayo ang gisugyot niya nga kantidad. Base hinuon sa balaod nga mga konsehal makahimo sa pag-override sa veto power sa mayor pinaagi sa 2/3 votes sa kinatibuk-ang gidaghanon sa mga konsehal. – /RUB) (BANAT NEWS)