9 gianod sa Cebu

CEBU, Philippines – Siyam ka mga tawo, upat kanila mga bata nga taga Leyte ang naanod sa dagat padung sa Sugbo human natikyaob ang ilang gisakyang pumpboat samtang nangaligo sa kadagatan sa Barangay Mahalit, Merida, Leyte.

Ang siyam naanod ug naluwas sa usa ka mananagat diha sa kadagatan sa Sitio Magpuyo, Lower Pob. lungsod sa Pilar.  Ang mga naluwas naila nga sila si Noel Serato, 20; Joefel Parilla, 20; James Serato, 18; Christian Orona, 18; Alexander Parilla, 17; Christian Alipar, 17; Khemmark Enero, 17; Charito Delaganar, 16; ug Godfrey Delaganar, 19, pulos magbarkada ug residente sa barangay Mahalit, Merida Leyte.

Matud nila nangaligo sila sa dagat niadtong Martes sa hapon sakay sa usa ka pumpboat. Apan samtang nagpalutaw-lutaw sila sa dagat kalit lang nanagko ang bawod ug natikyaob sila.

Naabtan na lang sila og duha ka oras nga naglutaw-lutaw sa dagat ug naanod sa sulog padung sa Pilar, sa Camotes Island sa Sugbo una pa sila naagian sa mananagat nga si Wendel Joyo.

Ang siyam gidala sa Pilar Municipal Health Center, si Noel Serato pabiling giobserbahan tungod sa dehydration. Si Police Officer 2 Adorberto Carba Jr. sa Pilar Police Station mibutyag nga gikatakdang kuhaon sa mga pamilya ang siyam ug dad-on sila balik sa ilang lungsod. – /EIM) (BANAT NEWS)