400 ka polis sa PRO-7 ipadala sa Tacloban

CEBU, Philippines – Moabot sa 400 ka polis nga gikan sa Police Regional Office-7 ang ipadala sa dakbayan sa Tacloban alang sa seguridad sa pagbisita sa Santo Papa.

Matud ni Sr. Supt. Erson Digal, hepe sa Regional Operations and Plans Division sa PRO-7, nga mas gamay kini sa 1,500 nga gipangayo sa PNP Directorate for Operations.

Ang grupo pangulohan ni Supt. Clifford Gairanod, ang battalion commander sa Regional Public Safety Battalion (RPSB-7).

Gipasabot ni Digal nga 400 lang ka polis ang ilang mapadala gumikan kay ang pagbisita sa Santo Papa sa Tacloban nadungan sab sa dakung kalihukan sa Sinulog sa dakbayan sa Sugbo.

“Atong focus duha – sa Region 8 for the security ni Pope and sa Sinulog sa Cebu kay mas daghan-daghan man pud ang tawo diri,” matud ni Digal.

Sumala pa ni Digal nga nakig-alayon na sila sa Central Command alang sa paggamit sa C130 cargo plane nga sakyan sa 400 ka mga polis samtang ang uban magsakay og barko.

Gikatakdang mobiya sa Sugbo ang mga polis karong Enero 10 ug mobalik sa Enero 20.

Samtang si Sr. Supt. Edward Caranza, ang chief of staff sa PRO-7, miingon nga may ipakatap sila nga mga polis sa mga pantalan sa Sugbo aron pagbantay sa mga pasahero nga moadto sa Tacloban ug moabot sa Sugbo.

Dugang pa ni Caranza nga wala sila’y nadawat nga impormasyon kabahin sa hulga sa seguridad sa Santo Papa.

Ang Santo Papa nia sa nasud sa Enero 15 hangtud 19 sunod semana. – /GMR) (BANAT NEWS)