Sinulog Festival sugdan na ugma
CEBU, Philippines – Opisyal na nga buksan ang Sinulog Festival sugod ugma, Huwebes, Enero 8. Ugmang adlawa usab sugdan ang misa nobena sa Fiesta Señor sa Enero 18.
Alas 4:30 sa kaadlawon himuon ang Walk with Jesus nga manukad sa Fuente Osmeña Circle paingon sa Basilica Minore del Sto. Niño de Cebu.
Giawhag sa mga opisyal sa simbahan ang mga mosalmot sa pagdala sa ilang mga rosaryohan, kandila ug imahe ni Sto. Niño. Human sa prosesyon, usa ka misa ang panguluhan ni Basilica rector Fr. Jonas Mejares sulod sa Basilica complex.
Atol sa maong misa, ipahigayun ang pag-instalar sa Hermano ug Hermana Mayor alang karong tuiga nga sila si Dr. Jose Enreque ug kapikas nga si Dra. Jill de las Peñas.
Ikaduhang misa alang sa unang adlaw sa nobenaryo ipahigayun sa alas 7 sa buntag ni Fr. Adrian Mendoza, sundan sa alas 8:30 ni Msgr. Renato Beltran, Jr., alas 10 sa buntag ni Msgr. Esteban Binghay, alas 11:30 sa buntag ni Fr. Leonardo Ellezar, ala 1 sa hapon ni Fr. Arnulfo Castillo, alas 2:30 sa hapon ni Msgr. Guillermo Gorre, alas 4 sa hapon ni Fr. Francis Kalonsa Limbeye, alas 5:30 sa hapon ni Fr. Mhar Balili ug alas 7 sa gabii ni Fr. Alfredo Jubac.
Isip hulip sa katapusang awit sa alas 7 sa gabii nga misa, usa ka mubong tradisyonal Sinulog ang ipahigayun gikan sa una ngadto sa ikasiyam nga nobena misa. Samtang tungod sa road concreting project sa V. Rama Avenue, lahi nga rota ang agian sa solemn foot procession sa Enero 17 sa hapon.
Gikan sa Basilica, moagi sa Osmeña Boulevard, moliko sa tuo paingon sa General Maxilom Avenue gikan sa Fuente Osmeña Circle, laing liko sa Imus Road paingon na sa M.J. Cuenco, Plaza Independencia, Osmeña Boulevard balik sa Basilica. – /GMR) (BANAT NEWS)
- Latest
