P200mil shabu nasakmit
CEBU, Philippines – Lima ka mga tawo og dul-an P200 mil nga drugas ang nasakmit sa managlahing anti-illegal drugs operations sa kapolisan sa Lapu-Lapu ug Bogo.
Nadakpan sa grupo ni Senior Inspector Rogelio Pineda Jr., hepe sa City Anti Illegal Drugs Special Operation Task Group (CAIDSOTG) sa Lapu-Lapu City Police Office (LLCPO) ang managsuong Marvin Dungog Daño, 32, ug Allan Dungog Daño, 34, diha sa Sitio Malingin, Barangay Punta Engaño.
Ang duha nadakpan sa buy-bust operation ug nakuhaan og 16 ka gagmay’ng pakete sa ginadiling drugas ug tulo ka medium sized nga shabu ingon man drug paraphernalia, si Allan gikatahong naaktohang nag-repack og shabu atol sa pagronda.
Matud pang Pineda, mokabat og P188,800 ang street value sa nakuhang shabu gikan sa managsuon.
Samtang tulo ka tawo ang nadakpan sa buy-bust operation sa Barangay San Vicente, Dakbayan sa Bogo.
Ang operasyon gipangulohan ni Senior Inspector Ildefonso Viñallon Miranda Jr. batok kang Ritchie Ybañez Yee, 47, kinsa nakuhaan og lima ka gagmay’ng paketeng shabu ug P400 nga marked money ug P800 nga salapi nga ilang gituohang halin sa drugas.
Nakaikyas hinuon ang ikaduha nilang target nga si Roger Catapan Oyasom, 29, sa Barangay Bungsod kinsa nakamatikod nga polis ang iyang gibaligyaan og shabu nga nagkantidad og P200.
Apan duha sa gidudahang mga kostumer ni Oyasom nga sila si Wilmer Pilapil Clarin, 19, ug Bebe Rondina, 21, pulos taga Taytayan ang nadakpan sa kapolisan. – /EIM) (BANAT NEWS)
- Latest
