Kapitan gipatay

CEBU, Philippines – Patay ang kapitan sa barangay Cambang-og bukirang bahin sa dakbayan sa Toledo sa nahitabong pagpamanhig sa Sitio Kabulihan, Barangay Ilihan, kagahapon sa buntag.

Si Timoteo Largo, 65, kapitan sa barangay Cambang-og ang gipusil patay sa usa ka  Dionesio Juarez nga giingong kumpare sa biktima nga nagpuyo ra usab sa iyang barangay.

Sa imbestigasyon sa kapulisan nga  gipangulohan ni Senior Police Officer  3 Henry Acosta, sakay si Largo sa iyang Ford Everest nga adunay plakang 7AT 121830 kauban sa live-in partner niini nga si Joely Baroman, 24, dihang nahitabo ang pagpamusil.

Matud pa nga  gikan ang duha sa Sitio Kawayan aron sa pagtan-aw sa himoong alternatibong dalan nga kaagian unta sa mga konstituwente sa barangay.

Pag-abot sa Sitio Kabulihan, usa ka multicab nga kolor maroon nga nagtangag og tampered plate number  nga 7LL 604 nga gisakyan ni Juarez ang kalit nga nibabag kang Largo.

Matud pa nga mikanaog si Largo sa sakyanan niini ug gikomprontase si Juarez apan kalit kining gikaligoan og bala ni Juarez gamit ang KG-9 submachine pistol.

Matud pa nga midagan ang biktima apan gigukod kini sa suspek ug giusban pagpusil hangtud nga natagak sa kanal si Largo. Ang sakay sa Ford Everest nga si Joely matud pa wala makalihok sa sud sa sakyanan ug matud pa gitionan kini og armas sa suspek ug gibaharan  ug pagkahuman misakay kini og balik sa multicab dayong pasirit palayo.

Gidala si Largo sa Toledo City Hospital apan gideklarar kini nga patay na. Usa ka Dionesio Pacris, 31, taga lungsod sa Aloguinsan ang naigo sa saag nga bala diha sa iyang tiyan dihang niagi kini sakay sa iyang gimanehong motorsiklo.

Gidala sa Toledo City Hospital si Pacris apan gibalhin ra usab sa tambalanan sa dakbayan sa Sugbo.

Ang mga sakop sa Special Weapons and Tactics ug kapulisan sa Toledo  gipangulohan ni Superintendent Ricky Delilis daling milusad og hot pursuit operation apan ang multicab na lang maoy ilang naabtan sa Sitio Panog sa Barangay Cambang-og.

Gidudahan nga mitago ang suspek ngadto sa bukirang barangay sa Barangay Casoy  ug padayon pang gipangita. Gisubay pa kun unsay motibo sa suspek sa pagpatay sa kapitan. – /EIM) (BANAT NEWS)