Disaster plan sa 3 ka lungsod kuwang

CEBU, Philippines – Gihulagway sa Provincial Disaster Risk Reduction Management Office (PDRRMO) nga tulo ka dapit sa habagatang bahin sa Sugbo nga nagrabehan sa bagyong Seniang ang dili aktibo ang ilang DRRM Program.

Gitumbok ang mga lungsod sa Ronda, Dumanjug ug Alcantara.

Base sa inisyal nga assessment human sa bagyong Seniang, gitumbok sa pangulo sa PDRRMO, Baltazar Tribunalo, nga ang maong mga dapit dili andam ug dili aktibo sa ilang pagpatuman sa mga programa sa disaster risk reduction.

Gani sa Ronda miabot sa 16 ang nakalas ug duna pa’y duha nga padayun’g gipangita human na-missing atol sa pagkuso-kuso sa bagyo.

Ang Ronda, Dumanjug ug Alcantara grabe sab nga gibaha atol sa pag-igo sa bagyo diin daghang mga residente ang wala dayon makabakwit gikan sa mga delikadong dapit.

Si Tribunalo nagtuo nga kun mas aktibo ang mga lakang nga gihimo sa maong mga lungsod pagpalig-on sa ilang disaster risk reduction program, dili unta grabe ang kadaut nga naangkon sa maong mga dapit ug minus ang casualty.

Matud ni Tribunalo nga importante nga dunay kaugalingon nga DRRM Office ug personnel ang matag lungsod aron maoy motutok sa mga gimbuhaton labot sa disaster preparedness ug response. – /GMR) (BANAT NEWS)