4 ka Koryano angol sa aksidente

CEBU, Philippines – Naangol ang upat ka Koryano nga naglakip sa duha ka bata dihang nasungag ang Toyota Innova wagon nga sakyanan sa motorsiklo nga gikasugat alas 3 ang takna sa niaging kadlawon sa dalan E. O. Perez, Subangdaku, dakbayan sa Mandaue.

Si PO1 Eduardo Martinez, traffic investigator sa Mandaue City Police Office (MCPO), miila sa mga naangol nga sila si Jinwoo Ann, 37; Joowon Kim, 33 ug duha ka bata nga sila si Seo Yeron A, 5 ug Do Enn An, 3, nga pulos nagpuyo sa Aviation Road, Basak, dakbayan sa Lapu-Lapu.

Nagsakay ang mga biktima sa Toyota Wagon nga nagdala og plate number GXK 653 nga gimaneho sa usa ka Francisco Negrido Naingue, 34, nga nagpuyo usab sa maong dapit.

Ang laing kauban sa mga Koryano nga sakay sa maong sakyanan nga ilang giluwanan nga lakip sa naangol mao si Rafael Padilla.

Samtang nagdagan ang maong sakyanan, kalit lang gikasungag ang naghaguros nga motorsiklo nga gikasugat nga gimaneho ni Lynyrd Dagayloan Luague, 28-anyos, nga taga Apas, dakbayan sa Sugbo. Ang mga biktima dali nga gihatud sa Chong Hua Hospital ug ang drayber sa motorsiklo nga gikasungag temporaryo nga gitanggong sa ilang detention cell. – /GMR) (BANAT NEWS)