Lumba sa motor sa Mandaue nibalik

CEBU, Philippines -  Gibantayan karon sa kapolisan ug sa mga sakop sa Traffic Enforcement Agency of Mandaue (TEAM) ang pagbalik sa lumba sa motorsiklo sa North Reclamation Area nga gipasiugdahan sa mga batan-on. Nabantayan sa kapolisan nga ang maong pundok sa mga batan-on magdala sab og nagkadaiyang matang nga sakyanan nga naglakip sa motorsiklo.

Magtapok sa mga gasoline stations ug mga fastfoods sa maong lugar ang mga batan-on samtang sayo pa sa gabii ug ang uban mag-inom-inom uban sa ilang mga hinigugma ug mga higala.

Tunga’ng gabii hangtud sa sayo sa kadlawon diin wala na’y kapolisan nga magpatrolya mopahigayun sa lumba sa motorsiklo.

Si Rosendo Muñez, 42, taxi drayber, miingon diha’y higayun nga hapit gyud masungag ang gimaneho niyang taxi sa gikasugat nga nagdagan nga motorsiklo nga gigukod usab sa laing motorsiklo nga iyang gituohan nga maoy gikalumba. Ang insidente nakapahadlok sa iyang pasahero nga babaye ug lalaki nga nagpahatud sa airport.

Si Arnold Malig-on sa Command Center sa Mandaue City Hall miingon nga ang maong lumba sa mga sakyanan sa reclamation area nahunong na kaniadto dihang adunay usa nga naaksidente og namatay.

Matud pa ni Malig-on nga subli na usab nilang bantayan ang maong lugar sa pagpakgang sa maong kalingawan sa mga batan-on panahon sa gabii.  (BANAT NEWS)