Gidunggab human sa Bag-ong Tuig
CEBU, Philippines - Grabeng naangol ang usa ka lalaki nga biktima sa pagpanunggab sa iyang silingan sa Purok Tambis, Yati, lungsod sa Liloan alas 12 pasado ang takna sa tungang gabii sa pagsugat sa Bag-ong Tuig.
Apan kagahapon lang sa buntag nitaho sa kapolisan ang tagtungod sa biktima.
Si Police Officer 3 Jesson Gayo sa kapolisan sa maong lungsod miila sa biktima nga si Patricio Pilapil Jr., 34-anyos, minyo nga nagpuyo sa maong dapit.
Ang suspek giila nga si Alan Tanodtanod, hingkod ang panuigon nga taga Poblacion, dakbayan sa Danao apan nag-abang og panimalay nga silingan sa biktima.
Matud ni Gayo nga diha sulod sa ilang panimalay ang biktima kauban sa iyang sakop sa pamilya nga nagsadya sa pagsugat sa tungang gabii sa Bag-ong Tuig.
Ang suspek kalit lang niduol ug sa wala’y igong hinungdan kalit lang gidunggab ang bukobuko sa biktima.
Dali nga nakapangayo’g panabang sa kapolisan ang sakop sa pamilya sa biktima apan duha sa mga anak sa suspek nga sila si Albert ug Alin ang nasuko ug nagbitbit og bato nga gihana sa paghapak ngadto kanila.
Ang asawa sa suspek nga si Maribeth ang dali nga niduol sa iyang bana ug gipasibat hinungdan nga wala nadakpi sa mga polis. (BANAT NEWS)
- Latest
