Gibiyaan sa asawa, kanhi maestra naghikog

CEBU, Philippines - Wala na nakaabot sa 2015 ang 20-anyos nga lalaki human naghikog patay sa sitio Combado, Ticad, lungsod sa Bantayan.

Ang nagpakamatay naila nga si Roland Saes, minyo ug nagpuyo sa maong lugar.

Matud pa ni PO1 Florante Disucatan, desk officer sa Bantayan Police Station, nga gumikan sa problema sa gugma naghikog patay si Saes.

Sumala pa ni Disucatan nga gibiyaan sa iyang asawa si Saes ug nakig-ipon sa laing lalaki didto ra sab sa ilang barangay.

Gumikan sa gibati’ng kasakit sa hitabo gidudahan sa pamilya ug kahigalaan nga mao’y hinungdan nga kini nikutlo sa iyang kinabuhi lima ka oras sa wala pa mosulod ang tuig 2015.

Sigun pa ni Disucatan nga pasado alas 7 sa gabii niadtong Disyembre 31 nabantayan na lang sa amahan nga si Romeo nga nagbitay na sa punoan sa kahoy nga kamansi si Saes gamit ang pisi.

Samtang sa lungsod sa Argao, usa sab ka retiradong maestra ang naghikog patay sa barangay Lamakan kagahapo’ng adlawa.

Ang naghikog patay naila nga si Sabina Divinagracia, 61, kanhi nagtudlo sa Bogo Elementary School. Matud ni PO3 Benjamin Herosaga sa Argao Police nga ang katabang sa maong maestra nga si Librada Panerio ang una’ng nakakita ni Divinagracia nga nagbitay sulod sa stockroom sa iyang balay.

Duna’y nakuha nga suicide note sa lugar nga gihikogan ni Divinagracia ug kini nag-ingon nga gumikan sa problema ug dili na sab kini makatulog, hinungdan nga kini nagpakamatay.

Igo na lang sab gitugon ni Divinagracia nga ipahiluna lang ang iyang patay nga lawas.

“Wala mani siya’y anak, pero ang ingon lang niya ipahiluna lang ang iyang lawas, wala pud niya giingon kung kinsa’y binlan sa iyang kabtangan,” matud ni Herosaga.  (BANAT NEWS)