St. James, Metaphil nilagda’g kasabutan

CEBU, Philippines – Pormal nga gilagdaan ang kasabutan tali sa tagdumala sa St. James Academy of Skills Technology, Inc. ug Aboitiz Group Construction , Inc.-Metaphil aron makapaubos sa hingpit nga pagbansaybansay sa mga maayong welders.

Ang kasabutan gilagdaan nila ni Brian Yuson, presidente sa St. James Academy ug Zenaida Novabos, vice president ug chief information officer sa Metaphil.

Gihimo ang paglagda sa kasabutan sa yano nga seremonyas sa buhatan sa Metaphil nga nahimutang sa Tipolo, dakbayan sa Mandaue.

Ang St. James Academy accredited sa Technical Education and Skills Development Authority (TESDA) nga maoy mopaubos sa pagbansaybansay sa mga estudyante.

Ang mga gradwado sa maong tunghaan ilabi na sa welding dawaton sa kadagkuan sa Metaphil ubos sa on-the-job training (OJT) program sa kompaniya.

Matud pa ni Yuson nga nalipay kaayo siya nga gilagdaan sa ilang tunghaan ang kasabutan ingon man sa Metaphil.

Midugang siya nga gawas nga mapaubos sa pagbansaybansay ang mga tinun-an aduna pa’y kahigayunan nga makasulod og trabaho sa maong kompaniya.

Gipasalig ni Yuson nga ang ilang mga tinun-an mapaubos gyud sa maayong pagbansaybansay. (BANAT NEWS)