Mga pabuto gisakmit

CEBU, Philippines -  Mga nagkadaiyang pabuto nga ilegal nga gipamaligya sa kadalanan, gipangsakmit sa kapolisan apan walay bisan usa nga namaligya niini ang nangadakpan.

Ang kapulisan sa Station 11, Mambaling Police nga gipangulohan ni Senior Inspector Jerry Bawiga mikompiska sa daghang pabuto diha sa Sitio Huyong-huyong sa Alaska, Mambaling ning siyudad sa Sugbo.

Ang mga nasakmit naglakip sa 45 ka dagkong pakete sa triangle, 65 ka medium ug 172 ka gagmay. Duna sa’y hotdog 19, shotgun 29, whistle bomb 28, narcissus 2, fireworks violet 8, blue 5, tulo ka Judas Belt  nga tag 100 ka rounds.

Matud pa sa kapulisan nga duna’y nakahatag nila og report nga duna’y nagbaligya og mga pabuto sa maong lugar hinungdan nga ila kini nga gisubay apan dali sab nga nakasibat ang mga mamaligya-ay.

Samtang ang Carbon police mikompiska sab sa ubay-ubay nga pabuto gikan sa mga nanglabay nila nga operasyon matud pa ni PO2 Mario Nator nga nahinabi sa Banat News. Ila nang gilauman nga sa katapusang  adlaw sa 2014 modagsa ang mamaligya niini.

Samtang gisakmit sa kapolisan ang mga sinakong pabuto nga gibiyaan sa duha ka wala mailhing lalaking nagsakay og motorsiklo diha sa Barangay Poblacion, sa Carmen.

Si PO3 Jerome Quimque, nasakmit nila ni SPO4  Windry  Pilapil sa dalan national ang maong mga pabuto human ilang namatikdan ang kalit nga pagsimang sa usa ka motorsiklo paingon na sa bukiran nga bahin sa maong lungsod.

Gisuwayan nila kini og gukod apan pag-abot sa unahan nakit-an nilang gihagbong sa duha ang usa ka sako ug mipasirit padagan palayo.

Dihang gisusi ang sulod sa maong sako, nasuta nga nagkadaiyang matang sa mga dagkong paboto ang sud niini nga naglakip sa Bawang, Super Lolo, Super Yolanda, Piccolo, Judas Belt ug uban pa nga pulos ilegal tungod sa gidak-on.  (BANAT NEWS)