Elf, motor nagsungag, duha angol

CEBU, Philippines – Grabeng naangol ang duha ka tawo dihang ang motorsiklo nga ilang gisakyan kalit lang nasungag sa Isuzu Elf sa national highway sa Binabag, dakbayan sa Bogo ala 1:40 niadtong Lunes sa hapon.

Ang naangol nga nagdala sa motorsiklo mao si Dexter Mayol Benitez, 25, ug angkas nga babaye nga si Myraflor dela Peña Benitez, 23, pulos taga Canduman, dakbayan sa Mandaue. Si Police Officer 3 George Gocena, imbestigador sa Traffic Section sa Bogo City Police Station miingon nga ang motorsiklo ni-overtake sa nag-una nga laing sakyanan subay sa pikas lane hinungdan sa pagkasungag sa Isuzu Elf nga gikasugat.

Ang duha ka biktima nalabay ngadto sa karsada nga nakaingon sa grabeng kadaut sa ilang kalawasan ug dali nga gihatud sa tambalanan.

Ang drayber sa Isuzu Elf nga si Ricardo Ochea Calesa, 39, nga taga Gairan, dakbayan sa Bogo ang nitahan ngadto sa kapolisan ug kasamtangang gitanggong ug nagpaabot sa tukmang lakang nga ilang himuon. – /GMR) (BANAT NEWS)