Duha nag-helmet nanulis sa tindahan
CEBU, Philippines – Mokabat sa P11 mil ang kwarta ug cellphone nga nasibat sa duha ka wala mailhing mga armadong lalaki nga nagmotorsiklo gikan sa usa ka lalaki sulod sa iyang tindahan sa Bag-ong Dan, Yati, lungsod sa Liloan.
Igo na lang sa pagsumbong sa kapolisan sa Liloan ang biktima nga si Junjie Pao Lumingkit, 27-anyos, taga Tayud, Liloan, kinsa miasoy nga igo lang siya nagtan-aw og TV sulod sa iyang tindahan dihang usa ka motorsiklo ang mihunong.
Wala na kini makapalag dihang nisulod sa tindahan ang duha ka armadong lalaki nga nag-full-faced helmet ug gitionan siya og armas ug nideklarar og tulis. Gihulagway sa biktima ang mga suspek kinsa ang usa adunay 5’4” ang gitas-on ug pula ang T-shirt ug maong nga karsones, itomon, igo lang ang gidak-on sa lawas.
Ang usa adunay 5’4” ang gitas-on, itomon ug tambokon, itom ang T-shirt ug ang motorsiklo nga gigamit adunay plate number nga 7AT126318. – /GMR) (BANAT NEWS)
- Latest
