Bagyong Seniang Cebu City ubos sa red alert

CEBU, Philippines – Gipaubos sa red alert status ang dakbayan sa Sugbo sa Cebu City Risk Reduction Management Council nunot sa paspas nga paglihok sa bagyong Seniang.

Base sa weather forecast sa PAGASA alas 5 sa hapon kagahapon, gisubay sa bagyo ang kadagatan sa Bohol  ug gilauman nga karong hapon naa sa 100 km kasadpan sa Dumaguete City padulong na ugma sa habagatang kasadpan sa Puerto Princesa City.

Gibanabana nga dunay 7.5 hangtud sa 15 mm ang uwan nga dala sa bagyo ug moabot og 4-meter ang gitas-on sa balud sa kadagatan.

Posible usab nga adunay landslide nga mahitabo sa mga bukirang bahin nga maagian sa bagyong Seniang.

Si Konsehal Dave Tumulak niawhag sa katawhan nga magbantay sa pagbaha ilabi na sa mga mountain barangays.

Gipasidan-an usab ni Tumulak ang mga bukiran sa pagmatngon sa landslide prone areas.

Nakasinati og kusog nga pag-ulan ang dakbayan sa Sugbo sugod pa kagahapon sa hapon.

Giandam na sa CCDRRMC ang mga rescuers ug mga heavy equipments.

Hinuon giklaro ni Tumulak nga wala pa’y gipabakwit nga mga residente bisan sa storm signal.

Kasamtangang gipaubos sa signal # 1 ang dakbayan sa Sugbo gawas sa habagatang bahin sa probinsiya nga gipaubos sa signal # 2.

Samtang gi-monitor sa Office of the Civil Defense-7 ang tibouk rehiyon sa nagpadayun nga bagyong Seniang.

Matud ni Allen Cabaron sa OCD-7 nga padayun ang ilang pagpakig- alayon sa mga local disaster units sa upat ka probinsya.

Usa sa panawagan sa OCD-7 nga magmatngon ang matag indibiduwal sa kahimtang sa ilang lugar ug kanunay nga maminaw sa balita ug sa pahimangno sa ilang lokal nga opisyal.

Wala pa’y natala nga dagkung hitabo dala sa bagyong Seniang sa Central Visayas ug gilauman ang zero casualty human sa bagyo. – /GMR) (BANAT NEWS)