Tapulan di pahataga’g honorarium

CEBU, Philippines – Tukion sa Association of Barangay Councils sa dakbayan sa Sugbo ang sugyot sa usa ka sakop nga dili hatagan og honorarium ang mga opisyal sa barangay nga dili molihok sa ilang gimbuhaton.

Sugyot ni Kapitan Boy Miranda sa baragay San Roque nga ang honorarium sa mga opisyal sa barangay mag-base sa performance.

“Dili tanan opisyal ang molihok sa ilang papel sa barangay ug igo ra magpakita lang sa barangay kun motambong og session ug pagkuha sa honorarium ang ubang mga opisyales sa barangay,” matud ni Miranda.  Dugang ni Miranda nga daghan gimando si Mayor Michael Rama sa mga barangay apan dili tanan ang nilihok sa pagsunod sa mando sa mayor sama sa curfew sa kabatan-onan nga subling hugot nga iyang gipatuman sa iyang barangay. Iduso ni Miranda sa ABC Board ang resolusyon kabahin sa performance-base nga pagpanghatag og incentives. Gikatakda nga patas-an ang honorarium gikan sa City Hall nga madawat sa mga opisyal sa barangay. – /GMR) (BANAT NEWS)