Motor nagbangga 4 patay

CEBU, Philippines – Upat ang patay ug lima ang naangol sa managlahing disgrasya sa kadalanan sa lalawigan sa Sugbo sa miagi’ng Sabado.

Patay ang duha ka backrider sa duha ka motorsiklo nga naglakip sa 2-anyos nga bata ug angol sab ang upat ka tawo human nagbangga ang duha ka motorsiklo didto sa Sitio Manan-aw, Barangay Tindog, Medellin.

Ang nangamatay naila nga sila si Edelfonso Fuentes, 60, ug ang bata nga si Carl Jay Cañete. Naangol usab sila si Renato Dela Rama, Zandro Cañete, Pablita Cañete ug Charry Mae Cañete, 15. Matud ni PO3 Marlon Villarin sa Medellin Police Station nga sakay sa usa ka motorsiklo ang pamilya’ng Cañete nga paingon na unta’ng mopauli.

Pag-abot nila sa maong lugar ilang gikasugat ang motorsiklo nga gimaneho ni Dela Rama kauban sa backrider niini nga si Fuentes nga nag-ikis-ikis ang dagan.

Si Villarin miingon nga hubog si Dela Rama nga gikan mitambong sa fiesta sa usa ka sitio sa maong barangay ug kusog nga nagpadagan. Misuway pa gani og likay si Zandro Cañete apan wala na malikayi.

Tungod sa kakusog sa bangga, nangalagpot ang mga backrider sa duha ka motorsiklo ngadto sa karsada.

Si traffic investigator Columbos Noynay Jr. miingon nga ang upat nga grabe’ng naangol ang unang gidala sa Bogo Provincial Hospital apan human sa paghatag og pasiunang pagtambal dali sila nga gibalhin sa  Vicente Sotto Memorial Medical Center sa dakbayan sa Sugbo.

Samtang sa lungsod sa Badian, patay usab ang duha ka drayber sa motorsiklo samtang angol ang usa ka backrider human sa panagbangga sa laing duha ka motorsiklo didto sa Sitio Curvada, Barangay Banhigan.

Ang namatay mao sila si Dominggo Calabroso, 65, taga Banhigan ug Christopher Cueto, taga Nasipit, Talamban. Ang angol mao si Cerilo Guardiario, 32, nga taga Barangay Dugyan, Dalaguete.

Nasayran nga atol sa hitabo paingon sa Poblacion, Badian si Cueto samtang paingon sa Banhigan si Calabroso. – /RUB) (BANAT NEWS)