Iwas Paputok sa Mandaue hingusgan
CEBU, Philippines - Gihangop sa kapolisan sa dakbayan sa Mandaue nga wala sila nakatala og biktima sa pabuto sa pagsugat sa Pasko sa 27 ka barangay sa siyudad.
Si Senior Inspector Allan Cuizon, deputy chief sa Operation Section sa Mandaue City Police Office (MCPO), niingon nga hayan sa pagsugat sa tungang gabii sa Bag-ong Tuig 2015 na magpabuto ang mga tawo.
Kini ang hinungdan nga ila’ng gihingusgan ang kampanya nga Oplan Iwas Paputok.
Tambag ni Cuizon sa mga residente nga maayo pa ang ilang sound system sama sa videoke ang himuong pagsabasaba sanglit dili kini risgo sa aksidente sa sunog o mabuthan.
Hingusgan usab ang kampanya batok sa ilegal nga pagpamaligya og mga pabuto sa dakbayan.
Si Senior Fire Officer 3 Roy Garcia sa Bureau of Fire Protection (BFP) sa dakbayan mibahad nga ang mga pabuto nga ibaligya ilang sakmiton ug bas-on og tubig aron dili na magamit sa pagsugat sa Bag-ong Tuig 2015. (BANAT NEWS)
- Latest
