Karnaper sakpan tungod sa GPS

CEBU, Philippines -  Pwerteng demalasa sa usa ka gipasanginlang carnapper human nga nababagan kini sa road block sa kapolisan sa lungsod sa Carmen tungod sa signal nga gisige og padala sa Global Positioning System (GPS) sa gikawat niyang van.

Ang suspek naila nga si Jonathan Quilapio Garay, 38, taga Butuan City apan nagpuyo na sa West Poblacion, Naga City nadakpang maoy nagmaneho sa kinawat niyang refrigerated van nga gikargahan og karne sa usa ka mall sa Barangay Alang-Alang, Dakbayan sa Mandaue.

Si Police Officer 1 Cristito Arescos  sa Carmen Police Station maoy nakadawat og tawag sa telepono gikan sa drayber sa maong refrigerated van nga si Angel Sanchez, sakop sa Gold Link Asia and Logistics Corporation. Si Sanchez mipahibalo nga gikawat ang iyang van nga may temporary plate nga 075306 nga iyang giparking sa parkingan sa maong mall.

Matud pa nga gibilin niyang nag-andar ang makina tungod kay konektado man ang refrigeration system niini aron di madaot ang karga niyang mga karne samtang naghatud siya og supply diha sa maong mall.

Matud pa ni PO1 Aresco nga dunay GPS ang maong sakyanan ug dali nila kining na-locate pinaagi sa signal niini sa cellphone nga nagpadung na sa Carmen.

Ang team  pinangulohan ni Senior Police Officer 3 Renerio Masucol Jr., Police Officer 3 Roger Delan ug mga kauban nagbutang og road block  hinungdan nga ilang nadakpan ang  suspetsado.

Gi-turnover ang suspek kang Senior Inspector Jimmy Portes nga maoy hepe sa kapolisan sa Presinto 1 sa Mandaue City Police Office (MCPO).

Nasayran usab nga ang suspetsado maoy mikawat sa L-300 van nga nagdala sa plate number nga YKJ 728 nga gipanag-iya sa Aqua Water Laboratory nga gimaneho ni Jonard Dilao  diha sa dalan A.C. Cortes Avenue sa Barangay Guizo sa dakbayan sa Mandaue. Giingong gibaligya niya kini sa usa ka Peter Mansoy sa Barangay Gun-ob sa dakbayan sa Lapu-Lapu nga narekober usab sa kapolisan apan wala na diha si Mansoy. (BANAT NEWS)