Upat Nangamatay

CEBU, Philippines - Upat ka tawo ang nangamatay human aksidenteng nangakuryentihan dihang nasanapan og tubig ang water pump sa lungag nga ilang gikawot aron himuon unta nga atabay diha sa Sitio Pasil, Maslog sa dakbayan sa Danao.

Ang mga nangamatay mao sila si Diomel Mayol, 19, Ernesto Ogabao, 49, taga Maslog, Danao City; Amick Bunconseho, Jess Christian Miguel ,21, pulos nitidlom sa ilawom sa lubog nga tubig sa lungag.

Matud pa ni Police Officer 3 Marlon Remullo sa Danao City Police Station sa pakighinabi sa Banat News unang naugkat si Mayol alas-5:19 na sa hapon, sunod si Ogabao alas 6:09 ug Miguel alas 7:40 ug ang kataposan mao si Bunconseho pasado alas-8 na sa kagabhion.  Base sa impormasyong nakuha ni Remullo, aksidente ang nahitabo, si Bunconseho ang nag-una sa ilawom dihang nakuryentihan kini ug mitabang dayon unta sila si Miguel ug Ogabao apan apil sa nakuryentihan.

Matud pa nga mitabang pud unta si Mayol apan nadakin-as kini ug natagak sa ubos ug apil sa nakuryentihan. Ang Bureau of Fire Protection Special Assistance  on Fire And Rescue Inc. (SAFARI)- Danao Chapter ug  kapolisan,ang nagtinabangay pag-ugkat sa upat gamit ang taas kaayong kuhit nga dunay hook nga pangkaw-it  aron pagbira kanila sa ibabaw.

Ang maong lungag gikataho nga 15 ngadto sa 20 ka tiil ang giladmon ug duha ka metros ang gilapdon, gisusi pa kun kinsa angay manubag sa maong aksidente. (BANAT NEWS)