Bus expire ang rehistro nasakpan
CEBU, Philippines – Gipahigayun sa Land Transportation Franchising and Regulatory Board ang inspeksiyon sa mga bus aron pagseguro nga wala’y kolorum nga makabiyahe panahon sa Pasko.
Nasayran nga nakahatag na ang LTFRB-7 og dul-an sa 100 ka special permits ug nagpadayon pa sila pagpanghatag niini sa mga terminal.
Matud sa operations head sa LTFRB-7, Francis Kaamiño, nga importante nga maseguro ang luwas ug komportable nga pagsakay sa mga pasahero. Atol sa inspeksiyon sa LTFRB-7, duna’y drayber sa Ceres Bus nagbiyahe og Bato-Barili nga nasakpan nga naghupot og expire nga rehistro hinungdan nga giisyuhan og Temporary Operator's Permit (TOP) ang drayber nga si Nilo Saornido.
Pahimangno sa LTFRB-7 sa tanang driver ug operators nga seguruhong dunay igong dokumento ang ilang mga sakyanan.
Matud ni Kaamiño nga bug-at nga silot ang atubangon niadtong mga magmaneho og kolorum nga bus ug uban pang PUV ubos sa bag-ong Joint Administrative Order sa DOTC, LTFRB ug LTO. Samtang giandam sa tagdumala sa Cebu South Bus Terminal ang mga pasilidad sa pagdagsa sa mga pasahero.
Matud ni Eddie Dusaban Sr., operations manager sa CSBT, nga giandam nila ang mga aircons, railings, lingkuranan ug close circuit television (CCTV) cameras sa terminal aron mahapsay ang seguridad sa mga pasahero samtang gibantayan usab sa kapolisan.
Tambag ni Dusaban sa mga pasahero nga mosunod sa patakaran sa CSBT aron hapsay ang terminal. – /GMR) (BANAT NEWS)
- Latest
